Фәрит Мөхәммәтшин Әлмәт шәһәр һәм район активы белән очрашты, Татарстан Конституциясенә 25 ел тулуга багышланган лекция укыды

Фәрит Мөхәммәтшин Әлмәт шәһәр һәм район активы белән очрашты, Татарстан Конституциясенә 25 ел тулуга багышланган лекция укыды

Республика халкына Мөхәммәт Сабировның исеме яхшы таныш. Эшчәнлеген Уфа нефть институтын тәмамлаганнан соң 1955 елда «Әлмәтбурнефть» трестының 2нче бораулау конторасында бораулаучы булып башлап җибәргән егет үзенең тырышлыгы, белеме белән хезмәт басыкычыннан бик тиз күтәрелә: баш инженер, трестның производство-техник бүлеге начальнигы урынбасары, партком секретаре, аннан КПССның Әлмәт шәһәр партия комитетының икенче секретаре, «Татнефтестрой» берләшмәсе җитәкчесе. 1984 елдан Мөхәммәт Сабиров Татарстан хөкүмәтенә эшкә чакырыла. Премьер-министр дәрәҗәсенә күтәрелә ул. Исән булса, бүген күренекле шәхесебезгә 85 яшь тулган булыр иде.

– Мөхәммәт Сабировны районга керткән өлеше белән лаеклы рәвештә безнең якташыбыз дип санарга хокукыбыз бар. 30 елга якын гомерен Әлмәткә багышлаган шәхес ул. Аның катнашында калабызда Боз сарае, нефть институты бинасы һәм башка объектлар төзелә. Шәһәрдә аның истәлегенә мемориаль такта ачу - безнең өчен мәртәбә. Бу инициатива белән чыккан төзүчеләргә, ветераннарга зур рәхмәт, – диде район башлыгы Айрат Хәйруллин.

Дәүләт Советы Рәисе Фәрит Мөхәммәтшин үзенең якты истәлекләре белән уртаклашты. Татарстанда гына түгел, федераль округ буенча да зур эш башкарган Мөхәммәт Сабировның хезмәт биографиясен барлап, эшчәнлеген югары бәяләп үтте.

– Илебез өчен иң авыр елларда да, союз таркалып, суверен республикалар барлыкка килгән чорда ул үзен ныклы оештыручы итеп танытты. Мин аның ялкынлы чыгышларын әле дә хәтерлим. Ул һәрвакып принципальлекне саклады. Мөхәммәт Галләмович Татарстан белән Россия арасындагы зур килешүне имзалауда нык ярдәм итте. Ул чактагы Россия Федерациясе белән төзелгән 12 килешү – Мөхәммәт Сабировның хезмәте нәтиҗәсе. Гадәти булмаган шәхес иде, – дип билгеләп үтте Фәрит Мөхәммәтшин. – Мөхәммәт Сабиров биографиясен биредә ныгытты. Миңа аның белән Әлмәттә дә, Казанда да эшләү бик рәхәт булды. Әлмәтлеләргә рәхмәт, сез, үзегезнең күренекле шәхесләрегезенең исемен мәңгеләштереп, зур эш башкарасыз. Хатирәләр тарих булып буыннан-буынга күчәчәк.

«Татнефть» компаниясе генераль директоры урынбасары Рөстәм Мөхәммәдиев Әлмәттәге хезмәт эшчәнлегенең күпчелеге нефтьчеләр тормышы белән бәйле булуы хакында бик җылы итеп сөйләде. Аны әле дә биредә фиакарьлек үрнәге буларак хәтерлиләр.

Мөхәммәт Галләмович тормыш иптәше Фәһимә Сәхәповна белән өч кыз тәрбияләп үстерәләр. Кызлары, оныклары, Әлмәттә әтиләре хөрмәтенә мемориаль такта кую тантанасына килеп, әлмәтлеләргә зур рәхмәтләрен җиткерделәр.

Гагарин урамындагы 10 нчы йортта урнашкан «ТаграС-Холдинг» ҖЧҖ бинасы мемориаль такта кую өчен юкка сайланмаган. Мөхәммәт Галләмович «Востокмонтаж» трестына 13 ел җитәкчелек итә. Абруйлы шәхес бер минут тынлык белән искә алынды.

Дәүләт Советы Рәисе 1981 елның 7 ноябрендә Әлмәтнең хезмәт ияләре тарафыннан 2017 елда якташларына уку өчен язылган хатны ачу һәм бер үк вакытта 2047 елда яшәячәк буын өчен капсула салу тантанасында катнашты. “Нефтьче” залында укып үтелгән яңа хатта: “... Чор эстафетасын сезгә – 2047 елда Әлмәттә яшәүчеләргә тапшырабыз. Сез – киләчәк өчен җаваплы. Без тынычлыкны сакладык. Сезнең бурыч – алдагы буыннар өчен тынычлыкны саклау. Бәхетле булыгыз!” – диелә документта.

Ә инде Дәүләт Советы Рәисе, сәяси фәннәр докторы, Әлмәтнең мактаулы гражданины Фәрит Мөхәммәтшинның шәһәр студентлары, предприятиеләр һәм иҗтимагый оешмалар җитәкчелеге белән ТР Конституциясенә 25 ел тулуга багышланган очрашуы эшлекле сәфәрнең төп вакыйгасына әйләнде. Парламент башлыгы тыңлаучыларга Татарстан Конституциясенең асылын гына аңлатып калмыйча башка бик күп сорауларга җавап бирде.

Материал "Әлмәт таңнары" газетасы язмасы нигезендә әзерләнде
Андрей Данилов фотолары