Пленар утырыш башланганчы, Фәрит Мөхәммәтшин Лаеш районы хакимияте башлыгы Михаил Афанасьев озатуында җирле товар җитештерүчеләр күргәзмәсе белән танышты.
Дәүләт Советы Рәисе Лаеш шәһәре Мәдәният йортында киңәшмәне ачып, семинарның быел инде унынчы тапкыр үткәрелүен билгеләп үтте. Авыл халкының эшмәкәрлек активлыгын көчәйтү буенча максатка омтылышлы эш Татарстанның беренче Президенты Минтимер Шәймиев идарә иткән чорда ук башланып китте. Хакимияткә Рөстәм Миңнеханов килгәч, әлеге ярдәм формасы системалы төс алды, диде ул.
Фәрит Мөхәммәтшин актуаль мәсьәләләр буенча фикер алышуга күчеп, авылда демографик вәзгыятькә борчылуын белдерде. “Безнең төп бурыч – авыл тормышын саклап калу. Авыл кешеләре – тарихыбыз һәм һәр халыкның иң яхшы традицияләрен саклаучылар ул”, – дип басым ясап әйтте парламент башлыгы. Авыл хуҗалыгы хезмәтчәннәре алдында торучы тагын бер зур бурыч – теге яки бу җирлектә яшәүчеләрдән авыл хуҗалыгы кооперативлары булдыру. Фәрит Мөхәммәтшин үзләренең территориясендә җитештерелгән продукция сатуның үсүе күзәтелгән җирлекләр башлыкларына ярдәм кулы сузуны тәкъдим итте.
Парламент башлыгы киләсе елга Татарстан бюджетында, шәхси ярдәмче хуҗалыкларны үстерүдә шартлар тудыру максатыннан, төрле программалар һәм грантлар төрендә барлык ярдәм формалары каралуын җиткерде.
Аның фикеренчә, шулай ук эшмәкәрләргә кагылучы “бюрократик процедураларны” гадиләштерү кирәк.
Киңәшмәдә авыл хуҗалыгы һәм азык-төлек министры урынбасары Ришат Хәбипов кайбер авылларда шәхси ярдәмче хуҗалык белән шөгыльләнүчеләр саны кимүен билгеләп үтте. “Балтач, Теләче, Әтнә, Кукмара районнары авылларында яшәүчеләрнең һәркайсы диярлек терлек асрый. Әмма Лаеш, Биектау һәм Питрәчтә яшәүчеләр күбрәк шәһәргә ыргыла”, – диде ул. Бу бурычны хәл кылу өчен комплекслы чаралар таләп ителә. Аның фикеренчә, иң мөһим бурыч – кешеләргә үзләренең яшәү урыннарында эш табу.
Дәүләт Советы матбугат хезмәте, Андрей Данилов фотолары