Авыл халкының эш активлыгын арттыруга юнәлтелгән зона киңәшмәләре 2009 елдан бирле уздырыла. Быел беренче шундый киңәшмәне 12 майда Кама Тамагы районында үткәрделәр, якын арада Бөгелмә һәм Нурлат районнарында үткәрү планлаштырыла.  Кече хуҗалыкларны үстерү буенча республика лидерларының берсе булган Саба районындагы киңәшмәне ачып, парламент башлыгы Татарстан Президенты тарафыннан авыл халкының эш активлыгын арттыру бурычы куелуын искәртте. Зональ киңәшмәләрдә агросекторга ярдәм чараларын камилләштерү буенча конкрет тәкъдимнәр эшләнә.

«Төрле дәрәҗәдәге хакимиятләрнең узара килешеп эшләве нәтиҗәсендә авылның үсешен характерлаучы күрсәткечләрне шактый югары дәрәҗәдә саклап кала алдык, - дип басым ясады Фәрит Мөхәммәтшин, - республикада агросәнәгать комплексын үстерү буенча зур эш башкарыла. Узган елда 263,4 млрд. сумлык продукция җитештерелгән, бу 2019 ел белән чагыштырганда 4 процентка күбрәк. Авыл хуҗалыгы продукциясе җитештерүе күләме буенча Татарстан ил төбәкләре арасында 4 нче һәм Идел буе федераль округында беренче урында тора, үзен авыл хуҗалыгы продукциясенең төп төрләре белән тулысынча тәэмин итә. Бөртеклеләрдән рекордлы уңыш җыелды - 5,6 млн. тонна».

5 меңнән артык авыл хуҗалыгы оешмасы, шул исәптән 4 меңнән артык фермер хуҗалыгы, шулай ук 468 меңнән артык шәхси ярдәмче хуҗалык исәпләнә торган республикада күп санда федераль һәм республика дәүләт программалары гамәлгә ашырыла, фермерларга грант ярдәме күрсәтелә, авыл хуҗалыгы кулланучылар кооперативларына ярдәм итү программасы эшләп килә. 2020 елда шәхси ярдәмче хуҗалыкларга ярдәм итүгә 477 млн. сум бүлеп бирелгән. Иң күп таләп ителгән юнәлешләр - халыкта савым сыерларын саклап калу һәм кече сөтчелек фермалары төзү. Парламент башлыгы фикеренчә, әлеге проектларда катнашырга теләгән авыл халкын актив җәлеп итәргә кирәк.

«Татарстан - кече хуҗалыкларга ярдәм итү, аларның продукциясен җитештерү һәм сату буенча системалы эш алып барыла торган төбәкләрдән берсе. Фермерлар, авыл хезмәтчәннәре продукциясенә сорау гадәттәгечә югары», - дип ассызыклады Фәрит Мөхәммәтшин.

Шәхси хуҗалыкларны үстерүне хокукый яктан тәэмин итүгә килгәндә, Дәүләт Советы Рәисе билгеләп үткәнчә, закон базасы формалашкан, республика территориясендә шәхси хуҗалыкларны үстерүгә дәүләт ярдәме турындагы закон гамәлдә.

Авыл халкының тормыш шартларын яхшырту буенча җитди эш алып барыла. Инфраструктура, җитештерү объектлары төзелә һәм ремонтлана, территорияләр, шул исәптән үзара салым институты аша төзекләндерелә.

Фәрит Мөхәммәтшин фикеренчә, авыл территорияләренең яңа йөзен формалаштыру - эшнең бик мөһим юнәлеше, чөнки авылны үстерү өчен эш урыннары булдыру гына түгел, халкыбызның рухи-әхлакый коды нигезе буларак, авылның гореф-гадәтләрен дә саклау кирәк.

Киңәшмәдә шулай ук Татарстан Республикасы Премьер-министры урынбасары - Татарстан Республикасы авыл хуҗалыгы һәм азык-төлек министры Марат Җәббаров, Саба районы башлыгы Рәис Миңнеханов, Татарстан Республикасы икътисад министрының беренче урынбасары Рөстәм Сибгатуллин чыгыш ясадылар.

Киңәшмә кысасында «түгәрәк өстәлләр» узды, аларда фермер хәрәкәтен үстерүнең иң актуаль мәсьәләләре: шәхси ярдәмче хуҗалыклар өчен субсидияләнгән кредитлар бирүне яңарту, кулланучылар кооперациясе продукциясен сату өчен логистик үзәк булдыру турында фикер алыштылар. Фәрит Мөхәммәтшин авыл хуҗалыгы программасын гамәлгә ашыруда катнашучы банклар җитәкчеләренең һәм вәкилләренең игътибарын авыл халкына бирелә торган кредитларга юнәлтте.

Семинар-киңәшмә кысаларында әйтелгән тәкъдимнәр йомгаклау документына керәчәк, ул чаралар алга таба кабул итү өчен дәүләт һәм муниципаль хакимият органнарына җибәреләчәк. "Акыллы тәкъдимнәргә һәм инициативаларга ярдәм итәргә тырышачакбыз", - дип ышандырды парламент башлыгы.

Семинар-киңәшмә азагында Татарстан Республикасы авыл җирлекләре арасында ел саен уздырыла торган республика конкурсында җиңүчеләрне бүләкләү тантанасы булды.