Дәүләт Советы Рәисе белдергәнчә, компания нефть каласы өчен генә түгел, бөтен республиканың социаль-икътисади үсешенә зур өлеш кертте.

– 1990 нчы еллар башында СМП-91 төзелеш-монтаж предприятиесе нигезендә барлыкка килеп, сезнең предприятие кыска вакыт эчендә республика әһәмиятендәге күптармаклы компаниягә әверелде, – диде ул.

Хәзерге вакытта предприятие составында нефть чыгару һәм авыл хуҗалыгы җитештерүе уңышлы үсеш алган. Предприятиенең үзәген юл-транспорт бүлекчәләре тәшкил итә, алар иң катлаулы мәсьәләләрне хәл итәргә сәләтле. 2006 елда компания «Европа – Көнбатыш Кытай» халыкара тизйөрешле автомагистраль төзүдә катнашу кысасында зур проектны гамәлгә ашыруга кереште. Аңа 27 млрд сумнан артык акча керткәннәр.

Фәрит Мөхәммәтшин компания коллективының социаль тармакларга ярдәм итүдән дә читтә калмавын билгеләп үтте. «Предприятие мәгариф, мәдәният, әйләнә-тирә мохитне саклау, физкультура һәм спорт, авылларда юл төзү һәм төзекләндерү, Әлмәт районы территориясендә урман торгызу юнәлешләрендәге социаль проектларны гамәлгә ашыруда катнаша. Бу максатларга 1,6 млрд сум акча тотылган, – диде ул. – Сезгә республиканың башка районнарында яшәүчеләр дә рәхмәт әйтә».

Дәүләт Советы Рәисе Фоат Комаровның «СМП-нефтегаз» компаниясе үсешенә керткән өлешен дә югары бәяләде. «Ару-талуны белмәс, талантлы оештыручы, белемле һәм җаваплы җитәкче ул», – диде Фәрит Мөхәммәтшин