Исәннәргә – хөрмәт, шаһитләргә – мәңгелек дан!

Хөрмәтле татарстанлылар!

2 сентябрьдә илебездә беренче тапкыр Икенче бөтендөнья сугышы тәмамлану билгеләп үтелә. Нәкъ менә шушы көнне Япониянең берсүзсез капитуляцияләве турында актка (хәрби хәрәкәтләрнең төгәлләнүен аңлаткан) имза салынды. Шулай итеп, иң куркыныч һәм иң канкойгыч сугыш елъязмасының соңгы битенә нокта куелды.

Дәүләтебез тарихында Икенче бөтендөнья сугышы белән чагыштырырдай башка бер генә сугыш та юк. Фаҗигасе, колачы һәм күп милләтле халкыбызның Гитлерга каршы коалиция илләре белән берлектә ирешкән данының бөеклеге ягыннан дөнья күләмендә дә аңа охшаш сугышның булганы юк. Әйе, без Җиңүгә бик зур корбаннар бәрабәренә ирештек. Әмма ул Ватаныбызны яклауга дәррәү күтәрелгән халкыбызның какшамас рухын, бөеклеген, мөмкинлекләрен, ихтыяр көчен күрсәтте. Миллионнарча халык, олысы-кечесе – барысы да фронтларда һәм тылда Җиңү көнен якынайтты.

Бүгенге буын тыныч күк йөзе өчен сугыш һәм хезмәт ветераннары алдында мәңгелек бурычлы. Бөек азатлык миссиясен башкарганда: фашизмның бөтен дөньяга хакимлек итү идеологиясенә юлны япканда һәлак булган барча фидакарьнең истәлеге дә – мәңгелек.

Сугыш 1945 елның 9 маеннан соң да дәвам итеп, солдатларыбыз һәлак булды әле. Ерак Көнчыгышта күп миллионлы Квантун армиясе тулысынча тар-мар ителеп, Япониядә милита¬ристик режим бәреп төшерелгәннән соң гына дөньяда озак елларга ныклы тынычлык, иминлек һәм тотрыклылык нигезе салынды. Безнең – Икенче Бөтендөнья сугышы каһарманнары, солдатлары дәвамчыларының бу фидакарь җаннарның бөтен кешелекнең якты киләчәге хакына Ватаныбызга тугрылыклы һәм намуслы хезмәт итүләрен онытырга хакыбыз юк.

Шул коточкыч сугышта совет халкының сугышчан данлы батырлыгы турында истәлек әлегәчә яши. Һәм менә бүген, дөньяда нацистлар Германиясенең соңгы союзнигын тар-мар итүнең данлы юбилее көнендә, бөтен игътибарыбыз хәзерге вакытта исән-сау яшәп ятучы Икенче бөтендөнья сугышы солдатларына төбәлгән.

Хөрмәтле ветераннар! Шул дәһшәтле еллардан елдан-ел күбрәк ерагаябыз. Сугышны сезнең сөйләгәннәрегез, китаплар һәм кинофильмнар аша гына белүче яңа буын үсеп җитте. Без сезгә булышырга, сезнең турында кайгыртырга гына түгел, бәлки яшьләргә данлыклы сугышчан һәм хезмәт традицияләрен тапшыруга да ярдәм итәргә тиеш. Ватанны ярату һәм аны яклау осталыгы – сезнең гаять зур мораль капиталыгыз әнә шул.

Сезгә, кадерле сугыш һәм хезмәт ветераннары, дан-шөһрәт, ихтирам-хөрмәт! Һәлак булганнарга – мәңгелек дан!